Matematiketan doktorea eta "Mujeres con ciencia" blogaren arduraduna den Marta Machok jasoko du 2016ko Berdintasunerako Emakunde saria

2016.eko abenduak 02

2016eko Berdintasunerako Emakunde Saria landa  matematiketan doktorea eta EHUko irakaslea den Marta Macho Stadler-entzat izango da. Hala erabaki du Emakunde Sariko epaimahaiak. Epaimahaiak azpimarratu du Marta Machok egindako lana emakumeak matematika eta zientzien mundura gerturatzeko eta baita emakume zientzialarien lana eta hauek akademia munduari eta garapen sozialari egindako ekarpenak ikustarazteko.  

Epaimahaiak goraipatu du matematiken hezkuntzan genero ikuspegia txertatu izana eta unibertsitatearen barruan emakume eta gizonen berdintasuna bultzatzen duten batzorde zientifiko eta akademikoetan parte hartu izana. Zentzu honetan, azpimarragarria da “Mujeres con ciencia” blogaren arduraduna dela. Blog hau Kultura Zientifikoko Katedrak bultzatzen du eta generoa eta zientzia gaia lantzen du, emakume zientifikoen lana ikustaraziz.

Sari honekin, Emakunde Sariko epaimahaiak aitortu nahi du hainbat irakaslek egiten duten lana, hezkuntza maila guztietan, nesken ahalduntzea bultzatuz eta hauek ikasketa zientifiko teknologikoak aukeratzera animatuz. Era berean, beharrezkoa ikusten du zientzia munduan emakumeen presentzia eta aitortza areagotzearekin batera, akademia bera, enpresak eta teknologia munduko agente guztiak egokitzea berdintasunean oinarritutako gizarte bat eraikitzeko.

 

Epaimahaia

Edizio honetako epaimahia honako hauek osatu dute: Emakundeko zuzendariak, Izaskun Landaida Larizgoitiak; Emakundeko idazkari nagusiak, Ana Alberdi Zubiak;  Arabako Diputatu Nagusiaren Gabinete Buruak, Nekane Zeberio Ganzarainek; Bizkaiko Foru Aldundiko Berdintasun Zuzendariak, María Guijarro Ceballosek; Gipuzkoako Politika Sozialen Diputatuak, Maite Peña Lopezek;  EUDELeko Berdintasun arduraduna eta Galdakaoko alkateak, Ibon Uribe Elorrietak; Emakundeko Prestakuntza eta Programak Arloko arduradunak, Raquel Raposo Acevedok; UPV/EHUko Antropologia sozialaren irakaslea den Margaret Bulletek; Clown irakasle eta Oihulari Klowneko partaidea den Virginia Imazek;  EJIEko admisnitrazio Zuzendariak, Iñigo Díazek; eta Belen Balerdik, Batzorde Kontsultiboaren ordezkari gisa. 

 

Sariaren helburua

Sariaren helburua da emakumeen eta gizonen arteko berdintasunaren arloan egindako lanarengatik nabarmendu diren pertsona fisiko nahiz juridikoei jendaurreko ezagutza egitea eta lan hori jendaurrean nabarmentzea; emakumeek egindako lana aintzat hartzea eta emakumeei boterean dagokien lekua itzultzearren egindako lanetan nabarmendu direnak saritzea, edo sexuen arteko eskubide- eta aukera-berdintasuna sustatzearren egindako lanetan nabarmendu direnak ere. Sariaren diru-kopuru gordina 14.400 euro da.  

Emakunde Sariak lau alorretan banatzen ziren 2006ko ediziora arte. 2006an Emakundek pentsatu zuen ekarpen bakar bat saritzea, nabarmenena, edozein arlotakoa izanda ere.  Sari bakarra ematen denetik hauek izan dira sarituak: Mari Jose Urruzola 2006an, Bagabiltza elkartea 2007an, Bizkaiko Emakumeen Asanblada 2008an, Lilaton taldea 2009an, 2010ean Teresa del Valle, 2011an Irun eta Hondarribiako alarde mistoak, 2012an Bilboko Modulo psikosozialak. 2013an La Posada de los abrazos elkartea, 2014an María de Maeztu Fórum Feminista, eta 2015ean Arabako Landa Eremuko Emakumeen Sarea eta Hitzez Baserriko Emakumeen Elkartea.

 
Euskadi, auzolana